ന്യൂഡൽഹി: ജഡ്ജിയുടെ ഉത്തരവ് പോർട്ടലിൽ അപ്ലോഡ് ചെയ്ത തീയതി ഉറപ്പുവരുത്താൻ ഹൈക്കോടതി ജഡ്ജിയുടെ സെക്രട്ടറിയുടെ സ്റ്റെനോ ബുക്ക് പിടിച്ചെടുക്കാൻ സുപ്രീം കോടതി ഉത്തരവിട്ടു.
'അജയ് മൈനി v. സ്റ്റേറ്റ് ഓഫ് ഹരിയാന & Ors' (ഡയറി നമ്പർ 45855/2025) എന്ന കേസിലാണ് സുപ്രീം കോടതിയുടെ ഈ നിർണായക ഇടപെടൽ.
വിഷയത്തിൽ രഹസ്യാന്വേഷണം നടത്താനും ടൈപ്പിങ്ങും അപ്ലോഡിങ്ങും സംബന്ധിച്ച നാഷണൽ ഇൻഫോർമാറ്റിക്സ് സെന്റർ (NIC) റിപ്പോർട്ട് സത്യവാങ്മൂലമായി സമർപ്പിക്കാനും സുപ്രീം കോടതി ബെഞ്ച് നിർദേശം നൽകി.
നേരത്തെ, വിധി പറയാനായി മാറ്റിവച്ച കേസുകളിൽ ഹൈക്കോടതികൾ വിധി പ്രഖ്യാപിക്കാൻ വൈകുന്നതിൽ ജസ്റ്റിസ് മഹേശ്വരി അധ്യക്ഷനായ ബെഞ്ച് ആശങ്ക രേഖപ്പെടുത്തിയിരുന്നു. വിധി പ്രസ്താവിക്കാനായി മാറ്റിവച്ച കേസുകളിൽ മൂന്ന് മാസത്തിനുള്ളിൽ വിധി പറഞ്ഞില്ലെങ്കിൽ, കേസ് മറ്റൊരു ബെഞ്ചിന് നൽകുന്നതിനായി രജിസ്ട്രാർ ജനറൽ ചീഫ് ജസ്റ്റിസിനു മുന്നിൽ വെക്കണമെന്നും സുപ്രീം കോടതി നിർദേശിച്ചിരുന്നു.
ജുഡീഷ്യൽ നടപടികളിൽ സുതാര്യതയും കൃത്യസമയത്തുള്ള ഇടപെടലും ഉറപ്പാക്കുന്നതിനുള്ള സുപ്രീം കോടതിയുടെ ശക്തമായ നിലപാടാണ് ഈ സംഭവം വ്യക്തമാക്കുന്നത്.
